بنتي عروسة جديدة، مبقالهاش أربع شهور جواز، واكتشفت بالصدفة إنها لسه ما بدأتش حياتها الزوجية مع جوزها! ولما هي حاولت تتكلم معاه وتفهم السبب، اتجنن ومد إيده عليها! بنتي هربت من بيتها الصبح بلبس البيت، وجتلي وهي بتترعش، بعد ما سمعت كلام من أهله خلاها تجري من غير ما تبص وراها!

لكن المفاجأة الحقيقية كانت لما واجهناه أنا وأبوها قدام عيلته، وطلب مننا طلب ماكنتش أتخيل إن حد ممكن يطلبه من أهل مراته!أنا أم من القاهرة، وعندي بنت واحدة هي حتة من قلبي، ربيتها وتعبت في تربيتها، وكان كل أملي في الدنيا إني أشوفها عروسة فرحانة ومستريحة في بيت جوزها.

ولما اتقدم لها شاب من محافظة تانية، من عيلة كبيرة ومعروفة في بلدهم، وافقنا بعد ما سألنا عنه كويس، وقلنا إن البنت هتعيش وسط عيلة تسندها وتحافظ عليها. بنتي كانت فرحانة بجوازها جدًا، ويوم الصباحية لما كلمتها أسألها عن أحوالها، قالتلي إنها مبسوطة وإن جوزها بيعاملها كويس.

الأكثر قراءة الان

الكرسي رقم 2A:منذ شهررجعت وأنا ناوي اربي بنتي واعلمها الأدبمنذ شهرامي ومراتي حكايات صافي هانيمنذ أسبوعين

وفي أول شهرين، كنت بشوف بعيني إنه مهتم بيها، يخرجها ويفسحها، وساعات يرجعوا متأخر، لدرجة إن حماتها كانت بتتضايق وتقول له إنه بيدلع مراته زيادة عن اللزوم. وأنا كنت بضحك وأقول في نفسي الحمد لله، أهو ربنا كرمني وشفت بنتي في إيد راجل بيحبها.

لكن بعد الشهر التاني، كل حاجة اتغيرت بالتدريج. بنتي بقت تشتكي من التعب، ولما أكلمها ألاقي صوتها مرهق، ولما أسألها عن السبب تقوللي إن شغل البيت كتير، وإن حماتها بقت تعتمد عليها في كل حاجة، من تنظيف البيت وتجهيز الأكل لحد خدمة خالات جوزها لما ييجوا يزوروا البيت.

كنت أقول لها يا بنتي إنتِ لسه عروسة، ومش مطلوب منك تشيلي البيت كله فوق دماغك!فترد عليا معلش يا ماما، أصل البيت كبير، وأنا بحاول أرضيهم. كنت بزورها مرتين في الشهر تقريبًا، وكل مرة أسألها إذا كانت مرتاحة، كانت تحاول تطمني.

لكن قلبي كان حاسس إن فيه حاجة مش طبيعية، لحد ما في يوم قررت أروح لها من غير ما أبلغها إني جاية. وصلت بيت العيلة، وأول ما دخلت الحوش، اتصدمت من المنظر اللي شوفته!لقيت بنتي واقفة لوحدها بتغسل حوالي خمس سجاجيد كبار، والمية مالية الأرض، وإيديها محمرة من كتر الفرك، وكل سجادة أتقل من اللي قبلها، ومفيش حد واقف يساعدها ولا حتى يسألها إذا كانت تعبت.

بصيت لها وأنا مش مصدقة، وقلت قدام حماتها إيه يا بنتي ده كله؟! إنتِ هتغسلي السجاد ده لوحدك؟ طب نادي حد يساعدك، إنتِ مش شايفة نفسك بتتعبي إزاي؟!حماتها ردت ببرود يا أختي ما كلنا بنشتغل، هو الجواز دلع وبس؟

ما تتعلم تشيل مسؤولية بيتها. كنت لسه هرد عليها، لكن بصيت لبنتي وقلت لها بالراحة على نفسك يا حبيبتي، إنتِ لسه عروسة، وممكن تكوني حامل وإنتِ مش واخدة بالك، مش كل التعب ده ينفع معاكي. وفجأة، لقيت وش بنتي اصفر، وإيديها وقفت مكانها، وبصتلي بصّة غريبة خلت قلبي يقبض.

استغربت، لكن مقدرتش أتكلم قدام حماتها. طلعت شقتها واستنيتها لحد ما خلصت، ولما دخلت عندي، قفلت الباب وقلت لها مالك يا بنتي؟ إنتِ اتغيرتي أول ما جبت سيرة الحمل ليه؟ فيه حاجة مخبياها عني؟ساعتها بنتي انفجرت في العياط، وقعدت قدامي وهي مش قادرة ترفع عينيها في عيني.